الخط المستقيم و المشي

اهلينا كانوا دايما يحكونا لما كنا نمشي رياضه و احنا صغار ان المسافه اللي بنقطعها في الذهاب هي نفسها في الاياب بس بنحسها اطول و بتاخد وقت اطول لانوا بنكون بلشنا نتعب و خطوتنا صارت ابطء
هاى النظريه صح من ناحيه التعب و تباطء الخطوات ما في شك ... بس انا رح اثبت انه المسافه مش نفس المسافه و بتكون اطول بالرجعه

هلأ علميا بحكوا ان اقصر مسافه بين نقطتين هي الخط المستقيم -هيك علمونا بالمدارس -و هاي نظريه صحيحة و مثبته علميا, و من خبرتي المتواضع بالمشي هالفترة بديت الاحظ انه في طريق الذهاب بكون مسنتره -يعني مركزة و مثبته حالى- على صف بلاط معين و بمشي عليها خط مستقيم بس و انا راجعه مع التعب بصير التركيز عندي يخف و ببطل قادرة اثبت على البلاطة مرة بميل يمين و مرة شمال, يعني بصير امشي زغ زاغ يعني مو خط مستقيم يعني المسافه صارت أطول يعني نظريه انه مسافه الذهاب نفس مسافه الاياب خطأ و هاي الدليل

كيفني بالله بالاستنتاجات

من يومياتي بالمشي
(1)
في اشياء كتير ممكن نضايق منها بحياتنا بس لم تختفي فجأه و ما نعرف سبب اختفاها رح يستفقدها ... زي ما عم استفقد حاليا الفار اللي كان قارفني و ينط من قدامي و انا بمشي كل يوم و صاروا اسبوع مختفي
صدق المثل القائل العشرة ما بتهون حتى على ابن الحرام
^_^
(2)
اب طول بعرض بيجوز لاعب كره سله من كتير ضخامته -طبعا ما شاء الله- و جنبه مخلوق بشري لا يتجاوز النص متر على السكوتر و بعمل رياضه مع ابوه
الله يحميهم و يخليهم لبعض
^_^
(3)
رجل بالسبعينات و يمكن بالثمانينات من العمر الابتسامه على وجهه و هو بتمشي و بجرّ مرته اللي اقعدها الكبر على كرسي و الابتسامه برضوا مرسومه على وجها
الله يعطيهم الصحة و طوله العمر و يديم المحبه بينهم
^_^