Mar 28, 2012

و من الحب ما قتل - 2

مش متزكرة اذا كنت كتبت عن جريمتي الاولي بحق سمكاتي لما من الحب الزائد و زود النظافة غسلت حوضهم بالديتول فماتوا بعد  اقل من ساعة من ترجيعهم للحوض :(  تفاصيل حادثة هون و من الحب ما قتل - 1

اما عن الحادث التاني الجديد للأسف هو زريعاتي :( من زمان و انا بحب الزريعة بالبيت و بحب النباتات بصورة عامة بحس انها بتعطي حياة بالبيت، كان عندي شويه زريعة و راح اجاني كما سبع زريعات جداد هدية من الاقارب لانهم بعرفوا حبي إلهم. زريعتي القديمة كنت جبتلها سماد سائل قرأت عليه انه لا يخفف و يحط مباشرة على الزرع، لما خلص من عندي رحت اشتري منه كمان للزريعات الجداد بس للاسف ما كان في مثله بس لقيت سماد سائل من نوع تاني فحكيت لحالي ما هو كله نفس الشي بس اختلاف ماركات و اشتريته و طب على الزرع بدون ما اقرأ عليه، تاني يوم بتفاجئ بالزريعات اللي ميت و اللي مسود زي كأنه محروق، بجد انصدمت من المنظر فرحت بسرعة على علبة السماد و قرأت عليها و المفاجأة طلعت ان هاد السماد الجديد كل 25 مل بتتخفف بلتر ماء 


 هاي نتيجة الحب الزائد و الاهتمام الزائد للزريعة 




^
هذه حاليا بدون و لا ورقة :(



^
حاليا الورق المسود اكثر :(

^
بقايا زريعة بتمنى انها تعيش :(

19 comments:

  1. أخيييييييييييررررررررررررررررررررررن

    شو إرتحت بس شفت البوست ع الجوجل ريدر
    هلأ صار بإمكاني اوصفك بالقاتله والشريره بدون ما حدن يفهمني غلط

    تسوء,تسوء

    مره بتموتي السكمات,ومره الزريعات
    تجبيش بسه,ولا كلب
    :(

    أرزوكي,, أرزوكي

    ReplyDelete
  2. إذا بعدهم ما ماتوا، جربي تسقيهم مية كثير، تعني حاولي تنظفي التربة من المادة الجديدة أو ع الأقل تخففي من تأثيرها


    ALWAYS READ THE LABELS!

    ReplyDelete
  3. انا مع تجربي نصيحة اخونا صالح
    وهيك اكيد ما رح يموتوا تسمما من الكيماوي ....رح يموتوا غرقاً من نصيحة صالح ...
    وهو بيتحمل المسؤوليّة
    وعليه التعويض
    ههههههههه
    مساء الفل

    ReplyDelete
  4. انا مش خبيره بس يمكن لو تغيري جزء من التراب و تسقيهم مي بزياده يمشي حالهم

    خسارتهم والله :$

    و في حال ما زبطت لا سمح الله...في اللي راح يبعتهم صالح باشا :)

    ReplyDelete
  5. السلام عليكم ورحمة الله
    جريمة كاملة العناصر
    والشهود
    والاعتراف سيد الادلة

    والقانون لايحمي المحبين

    رفعت الجلسة للمداولة بين المعلقين

    ReplyDelete
  6. ام عمر :\
    الله يريح بالك دايما و ابدا :\ و يبعد الشماته عني :\

    بس نفسي افهم شو هالكلمة
    أرزوكي *_*

    ReplyDelete
  7. صالح

    اول ثلاث خلص ماتوا بعد تاني يوم :( بس الباقي لسه فيهم روح فعم احاول اسقيهم بشكل يومي على امل الله يشفيهم :(

    بعد هالدرس اكيد رح اقرا كل حرف على اي شي بشتريها مش مزحة طلعت الشغلة :(

    ReplyDelete
  8. يوسف

    ههههههههه ضحكتني من قلبي :) و الله شكله هاد اللي عم بصير فيهم من كتير ما عم اسقيهم مرات بتفيض الميه *_*

    بس خلص اذا صالح رح يعوضي مو مشكله رح اكمل عليهم :)

    ReplyDelete
  9. ويسبر

    انا بصراحة ما غيرت التراب خفت اخرب الدنيا بزيادة بس اللي عملته زدت عليهم شويت تراب و حاولت اخلطهم و بسقيهم ميه كتير ... و هيني عم بستنى الزريعات اللي رح يبعتهم صالح :D

    ReplyDelete
  10. الأخ علي :)
    و عليكم السلام و رحمة الله و بركاته

    "حتى أنت يا بروتوس" :D

    تتهمني بالاجرام :(

    و اذا المداولة و الحكم رح يصير من المعلقين فالنتيحة محسومة و حكم علّى بالاعدام :(

    كل الاحترام :)

    ReplyDelete
  11. يا حرااااااام....سمة بدن من الاخر
    معلش الله يعوض عليكِ ...
    بس جربي اسقيهم كتير بلكن بيخف تركيز الماده شويه ....هيك هيك خربانين :)

    ReplyDelete
  12. نيسانه :)

    صباحك ورد :)
    من ناحية سمة البدن فكانت سمة بدن رهيبة
    بس زي ما حكيتي الله بهون و الله بعوض

    عم استقيهم و ان شاء الله ربنا يشفيهم يارب :)

    ReplyDelete
  13. أرزوكي=أرجوكي
    ههههههه

    قليلي كيف طلع معك أوبشن الفلو أب؟؟
    ينعن أخص مخليتش خرم بالبلوغر عشان يرجع
    كشور

    ReplyDelete
  14. بكل تأكيد رح يسقط المزيد من الضحايا والخسائر المادية والمعنوية حتى تعرفي أسرار الزريعة والسمك متلي تماماً وفي كل مرة بقول آخر مرة وبيموتوا وبرجع من جديد أكرر محاولاتي الفاشلة :) ... بالتوفيق دايماً وعساهم آخر الضحايا

    ReplyDelete
  15. نور :)

    ههههه طمنتيني يعني مو بس انا عندي محاولات و تجارب فاشلة هي في صديق متلي :)

    يلا و شجعتني ارجع اجيب سمكات و الله ان وجودهم بالبيت حلو و هيك منظر الميه برد الروح :)

    موفقة في تجاربك الجديدة :)

    ReplyDelete
  16. قتلتيهم!

    قتلتيييييييييهم!

    كلو من أم عمر

    :bad influence:

    ---

    شو جبتولنا من قطر صحيح

    خخخخ

    ReplyDelete
  17. هيثم :(
    ماتوا ماتوا ياحرام
    قتلتهم ام عمر :(

    :D

    جبت لحالي قصدي إلكم
    مغناطيس للثلاجة عشان اثبت وصولي لقطر
    مكسرات كتير زاكيه
    قطعة قماش إلي قصدي لام عمر ;)
    و ساعة انتيك للبيت

    بس

    ما كان في وقت كتير للشوبنج اللي بسر القلب :D

    ReplyDelete
  18. ام عمر :S

    اي ابشن اللي بتحكي عنه :S

    دا انا ضايعة بالبلوج الجديد :S

    ReplyDelete
  19. هوه كان زر السبسكرايب رايح
    من نفس البلوغر
    ورجع اول ما رجع ع مدونتك

    فكرتك إنتي اللي عدلتيه ههههه

    أنا مقتلتش كتير بحياتي
    غير كم أفعى وكم صرصور وكم فار وكم عرسه وكم وكم وكم

    بس مقتلتش سكماتك ولا زريعاتك
    يا مجرمه
    تسوء تسوء

    ReplyDelete