كل يوم الصبح بحب اوصل قبل الدوام عشان اتصفح النت و مواقعي المفضلة و منها جريدة الامارات اليوم، وهي جريدة بتهتم بالاخبار المحليه اكثر من الدولي و بتحط عن مشاكل البلد و حوادثها يعني الحياة اليوميه هون بالامارات
اليوم و بالاخبار الرئيسية عم اقرأ هالخبر وفاة شخصين غرقاً في الشارقة رح قبلي وجعني على الشب الفلسطيني سبحان الله كل و احد بحن لاهل بلده و كتير تضايقت و خصوصا انه بعمر اخوي و غرق في المنطقة اللي ساكن فيها اخوي, لدرجة اني كنت ناوية احكي اطمن على اخوي بعد ساعة زمن من قراتي للخبر لاني بجد ما ارتحت للخبر مع العلم اني متأكده انه مش اخوي لانه اخوي مش تاع سباحة في البحر و هالقصص بس هيك الموضوع ضايقني
قرأت الخبر و رجت لشغلي و كنت بدي توقيع مديري على ورقة فرحت على مكتبه الا بحكيلي في خبر مش حلو بخصوص طارق
انا : قصدك خليل! صار معه شي! ** لان خليل اخو طارق و هو شب باول العشرينات سافر فجأة الاسبوع الماضي على عمان لان اكتشفوا عنده سرطان بالامعاء و بحالة سيئة - الله يشفيه و يعافيه
مديري : لأ بخصوص طارق
أنا : اه بعرف انه اخو خليل
مديري : طارق الله يرحمه
أنا : قصدك خليل
مديري : لأ طارق امبارح غرق و هو عم ينقذ ابنه في البحر
اظن انا تميت 10 دقايق بس واقفه مبلمه في حالة من عدم التصديق و ربط الاحداث مع الخبر اللي قرأته بالجريدة
سبحان الله المرحوم طارق بعمر اخوي بالزبط و ساكن بنفس عمارة مع اخوي
سبحان الله
{وَمَا تَدْرِي نَفْسٌ مَّاذَا تَكْسِبُ غَدًا وَمَا تَدْرِي نَفْسٌ بِأَيِّ أَرْضٍ تَمُوتُ}
{فَإِذَا جَاءَ أَجَلُهُمْ لاَ يَسْتَأْخِرُونَ سَاعَةً وَلاَ يَسْتَقْدِمُونَ}
الله يصبر اهلهم صدمتين بأسبوع واحد كل وحدة اثقل من التانيه
الله يشفيه لخليل و عسى بشفاءه يكون سلوي لأهل الفقيد
سبحان الله موت الفجأة شو صعب انا الغريبة و لسه مش قادرة اصدق ما بال اهله كان معهم يلعب و يضحك و بلحظات يمكن ما كملت الساعة صار بلا روح
يارب رحمتك يارب
الله يرحمه ويخفف عنه ويصبر اهله على ما إبتلاهم
ReplyDeleteويشفي مريضهم ويخفف عنه إبتلائه ويرحمه ويوقف معاه وما يذله يارب
الله يرحمنا كلنا
لا حول ولا قوة إلا بالله ..
ReplyDeleteالله يرحمه ويغفرله ..
ويصبر أهله على ما صابهم ..
لا إله إلا الله
ReplyDeleteدنيا فانية و غريبة بالفعل
الله يرحمه و يصبر أهله
لا حول ولا قوّة الا بالله العلي العظيم
ReplyDeleteالله يرحمه و يغفرله و يدخله فسيح جنانه
و ربنا يصبر اهله
الله يرحمه و يحسن إليه
ReplyDeleteمن كم يوم كان بينا في اجتماع يحكي و يناقش شخصيته كتير قوية و متحدث رهيب و صوته جهور، من الناس اللي انا كنت اخاف اروح اجتماعاته من كتير من هو شخصيه قويه و قياديه
سبحان الله لما الموت يجي ما بفرق بين قوي و ضعيف، و كل قوة الانسان بتتلاشي مع عظمة الموت
طول امبارح و هو في بالي بتزكر كل حركاته و كلامه، ما بالك اهله و اولاده، يارب صبرهم يا رب
شكراً جميعا لدعائكم إليه عسى الله يتقبل منك الدعاء