Apr 7, 2008

الصحة بين الماضي و الحاضر

"عشان الهباب اللي بتاكلوه"

بما انه اليوم هو اليوم العالمي للصحة بدي احكي عن هالجمله اللي كتير منا اكيد سمعها اكتر من مره اذا غلط و شكى انه بطنه ظهره او راسه بوجعه, وبدي اخص بالذكر الناس اللي زي حالات اللي ما بياكل اكل مطاعم او بالاخص الوجبات السريعة غير مرة او مرتين بالشهر ... هلأ انا معهم انه هاي الوجبات و اصناف معينه من اكلنا متل الشوكولاته و البوظة و الحلويات عبارة عن اكلات ضررها اكتر من نفعها بس مش لدرجة انها توصل للامراض اللي عم يعاني منها الجيل الجديد متل الدسك, الضعط, السكري و مرات عافنا الله و اياكم للجلطات المميته, يعني حتى ناس ايام زمان كان جزء كبير من اكلهم ضار خصوصا لما كانوا يشربوا زيت الزيتون و ياكله الليه و الدهون بكميات كبيرة هالشي اكيد ضار كمان

بس اللي اختلاف بين زمان و الحاضر طبيعه الحياه و العمل اللي انفرضت علينا ,زمان كانوا الناس يشتغلوا بالفلاحة و الرعي و من هالاعمال اللي بتتطلب مجهود عضلي و حركة بتحرق كل الدهون و الاكل الضاراللي الواحد اكله و بنفس الوقت بتكون بمثابه رياضه يوميه الهم بالاضافه للمشي لانه ما كان في مسافات كتير كبيرة بالقرى و كمان ما كان في وسائل تنقل تانيه متوفرة
احنا جيل اليوم المعترين اول شي انفرضت علينا المسافات الكبيرة فبطل الواحد يقدر يتحرك من محل لمحل الا بالسيارة أو اي وسائل مواصلات و ما ادراك شو بتسبب من امراض للجهاز التنفسي من جراء تلوث العادمات يعني حتى لو الواحد بفكر يمشي رح ينخنق طول الطريق من السيارات اللي حوليه ,و كمان انفرض علينا شغل المكاتب اللي الواحد بنكسر ضهره من القعدة و الاغلب بتكون على كراسي مش صحيه و ببوزّه عينيه من البحلقه بالكمبيوتر او بالكتب, وكمان هالتلفونات المتحركة و شو فيها من اشعاعات بتأثر على دماغ الانسان و غيروا من اشياءات اللي بتضر فينا ضريبه التقدم و التكنولوجيا


يعني و الله ما احنا عاطلين و بناكل اكل صحي بس حياتنا صارت صعبه

:3ayoot smiley makel bahdaleh men fatra 2reebeh:


و الله يكون بعونا و بعون الاجيال الجاي شو رح يجيها ضرائب اضافيه على صحتها

8 comments:

  1. ممكن أضيف

    أول شي صباح الخير

    ثاني شي سناح الخير

    الحمد لله الذي لا يحمد على مكروه سواه
    يعني مهو الصحيح أنا عايش في بيئة كثير نظيفة
    حتى إسألي لونار
    الرصيفة عبارة عن منتجع صحي
    يؤمه المصطافون من شتى بقاع الأرض
    لوفرة الأماكن السياحية فيه
    وهي على سبيل الذِكر وليش الحصر:

    الفوسفات
    المحرقة
    مصنع الخميرة
    مصنع الإنتاج
    مجمع جديد لتجميع وكبس النفايات
    كسارات
    محاجر
    محطة عين غزال - هاي بتصبح بهواءها العليل كل يوم تقريباً





    بكفي لهون بلاش أقوم أنتحر كمان شوية
    وتحيا الصحة

    ReplyDelete
  2. لأ شو تنتحر الله يهديك
    هاي الدنيا عم تنتحرنا شوي شوي من كتر التلوث اللي بحيط فينا

    جد الله يعينكم بالرصيفه انا بعرفها
    انا عشيت في عمان 8 سنوات جد التلوث فيها شي خيالي
    و كمان بسوريا و كل الدول الا طبعا بمناطق الارياف و المنتجعات بس مين فيو يعيش هناك

    يعني بالامارات مش احسن حال
    حر و رطوبه و مكيفات
    يا ويلي بس واحد يمرض بالعمارة لازم كل سكان العمارة يمرضوا

    غير على انه اكلنا اللي مفروض يكون طبيعي صار يدخل فيه المواد الكيمائيه و الهرمونات

    الحمد لله اللي لسه عايشين لهلأ

    الله يعطيك الصحة و العافيه يا رب

    ReplyDelete
  3. الله يعافيكي ويقويكي

    ما أنا مش حابب أفوت بموضوع الأكل
    لإنه ما في مجال للحكي فيه

    بأكمن كلمة مختصرات

    ما عاد في أكل ولا مزروعات طبيعية
    كله صار بالكيماوي والهرمونات
    وفقد كله قيمته الغذائية
    حتى رائحته إختفت


    سبحان الله
    ما في إنسان - إلا من رحم ربي
    إلا بتطلع عالتفاحةإللي بإيد غيره

    ReplyDelete
  4. معك حق يا سفو
    الله يعينا و يعين الاجيال الجاي


    بس فكرك احنا رح نصير نحكي للاجيال الجاي نفس حكي اهلنا إلنا


    جد بتصير نكته
    :D

    ReplyDelete
  5. صباح الخير ليونس

    أكيد راح نحكي نفس الحكي
    هاي سنة الحياة

    ReplyDelete
  6. صباح الخير جميعا

    مقال جميل و جد مشكلة هالغذاء مشكلة
    عويصة

    يعني حتى الماركيتس اللي بالمولات بتبيع خضروات و فواكه مهرمنة و ما عليها الطعم بس شغل الوان و اشكال حلوة

    هاد غير الوجبات السريعة خصوصا هون لانو فش وقت و خلق للواحد يقعد يطبخ

    بس اذا بدك تلعبي رياضة بتقدري تروحي عالحدائق .. حلوة كتير شغل مشي او ركاض و في حدائق مخصصة للاناث

    :سمايل صار ضعفان 2 كيلو من الدايت:

    ReplyDelete
  7. sfo

    افهم من هيك ... رح نلاقي نفس الموضوع في بلوجات الاجيال القادمه
    :D

    funny :D

    ReplyDelete
  8. ما شاء الله محمد
    واو 2 كيلو كتير منيح

    انا زايده 6 كيلو بس فرحانه عليهم ^_^ الحمد لله

    بس هاد لا يمنع من الرياضه مش للتنحيف بس للصحة و اللياقه
    كنت مرات امشي على البحيرة بس كان الجو منيح

    هلأ بلش يحمي :(

    بالنسبه للاكل خصوصا في دول الخليج
    الخضرة و الفاكهة ما الها اي علاقه بشي اسمه طبيعي

    كمان شوي رح يبعونا بلاستك و يحكوا عنه طبيعي

    و اّاّاّل ليش الصحه عم تدهور بسرعه
    الله يعين

    ReplyDelete