2012

باي باي 2012 و حأكسر وراكي محل جرار مش بس جرة :)

على الرغم  من انها كانت سنة مليانه فعليات و نشاطات و سفرات بس بنفس الوقت ما حبيتها و حسيتها ثقيل جداً على قلبي و مش مريحة 

سنة 2012 بدي اسميها سنة السفرات

• بشهر واحد سافرت اسبوع على الأردن-عمان: كالعادة سفرة عمان دايما بتنتهي بنهايات غير سعيدة :)
• بشهر ثلاث سافرنا عطلة الاسبوع على قطر : تعرفت على ناس جداد و كانت كتير تجربة حلوة.
• بشهر اربعة (اخر اربعة و اول خمسة) سافرنا على تركيا : سفرة من العمر :) طبيعة بتجنن و جو رائع و الاهم أكل زاكي و زكريات حلوة. :)
• بشهر تسعة سافرنا على الصين : تنذكر و ماتنعاد ×_× مش طبيعي شو كرهت هالبلد. بس الصراحة الشوبنج هناك رهيب D:
• بشهر عشرة اجازة عمان التانية : و لايزال مسلسل النهايات الغير سعيدة مستمر  D: مش عارفه ايمتى رح يتغير الوضع مع عمان :) هو الغلط مني الغلط من عمان و الله ما انا عارفه ×_×

على الصعيد المهني

• سكرنا مشروعين مش كتير كبار بس بنفس الوقت مشاريع مهمة و حساسه و عليها عدد كبير من المعاملات و الحمدلله بوقت ممكن اعتبره قياسي و بأضرار قليلة :) بس لازم طبعا مع المشاريع يكون في مصائب و كوارث :) بس الحمدلله عدت على خير :)
• ودعنا مدير و اجنا مدير جديد نقيض المدير السابق  بكل شي (للأحسن للأسوأ و الله بطل الواحد يعرف يميز هالايام) بس اللي بعرفه ان صار لازمنا نتأقلم من الوضع الجديد :)
• ضغط الشغل كان كتير هاي السنة و خصوصاً فترة تغيير المدير بشهر عشرة بس هلأ الوضع صار اخف و تنظم الشغل اكثر (مديرنا الجديد عنده مبدأ التملص من الاشغال ^_^ فبحرص على تحويل الشغل دايما للادارات الاخري فخف الشغل علينا لوووول ^_^ )

على الصعيد الصحي

• الحمدلله 2012 تابعت سلسة امراض الرشح و الانفلونزا اللي بلشتها سنة 2011 و زادت عليها لوصلنا لالتهابات الجيوب الحادة و لكن الحمدلله بعد 14 يوم من المضاد الحيوي تحسن الوضع و اظن ما ضل فيروس قادر على العيش في الجسم :) و الحمدلله بعدها تحسن الوضع كتير :)
• وقعت علي رجلي و اجاني شد عضلي اسبوع مو قادرة احرك رجلي من الوجع :( بس الحلو بالموضوع الاجازة المرضية :)

على صعيد الفسح و الفعاليات

• طلعت على برج خليفة اعلى برج بالعالم :) على الطابق 124 وااااااااو المنظر رهييييب :)
• رحت على عالم فيراااااااارررررررررررري ^_^
• شاركت في مسيرة عيد الاتحاد لوووول تحشيش الوضوع بس اتكسرت من المشي ساعتين ×_×
• رحت الفجيرة للمرة الاولي بحياتي و اكلنا بمطعم اقل ما يقال فيه زباله امنيح اللي ضلينا عايشيين بعديها ×_×
• رحت سوق نايف لوووووووول السوق الشعبي في دبي رهيب كله زقق و زنقات :)
• رحت القرية العالمية ثلاث مرات ×_× مش معقول شو هالهنا اللي انا فيه :)

الحمدلله سنة منيحة نوعا ما بس برضو دمها ثقيل :(

ان شاء الله سنة 2013 تكون سنة حلوة و خفيفة على الجميع و تكون سنة خير للجميع :)

سبحان الله بعد ما كتبت اللي فوق حسيت شو اني جاحده لنعمة الله كل هالنعم و بحكي عنها سنة دمها ثقيل :(

يارب لا تؤاخدنا بذنوبنا يارب و لا تؤاخذنا بجهلنا و تقصيرنا يارب العالمين 

اللهم ما اصبح بي او امسي بي من نعمة فمنك وحدك لا شريك لك فلك الحمد حمدا كثيرا حتى ترضي و لك الحمد اذا رضيت و لك الحمد بعد الرضي حمداً طيباُ مباركاُ فيه ملء السموات و الأرض و ملء ما بينهما.