و من الحب ما قتل - 2

مش متزكرة اذا كنت كتبت عن جريمتي الاولي بحق سمكاتي لما من الحب الزائد و زود النظافة غسلت حوضهم بالديتول فماتوا بعد  اقل من ساعة من ترجيعهم للحوض :(  تفاصيل حادثة هون و من الحب ما قتل - 1

اما عن الحادث التاني الجديد للأسف هو زريعاتي :( من زمان و انا بحب الزريعة بالبيت و بحب النباتات بصورة عامة بحس انها بتعطي حياة بالبيت، كان عندي شويه زريعة و راح اجاني كما سبع زريعات جداد هدية من الاقارب لانهم بعرفوا حبي إلهم. زريعتي القديمة كنت جبتلها سماد سائل قرأت عليه انه لا يخفف و يحط مباشرة على الزرع، لما خلص من عندي رحت اشتري منه كمان للزريعات الجداد بس للاسف ما كان في مثله بس لقيت سماد سائل من نوع تاني فحكيت لحالي ما هو كله نفس الشي بس اختلاف ماركات و اشتريته و طب على الزرع بدون ما اقرأ عليه، تاني يوم بتفاجئ بالزريعات اللي ميت و اللي مسود زي كأنه محروق، بجد انصدمت من المنظر فرحت بسرعة على علبة السماد و قرأت عليها و المفاجأة طلعت ان هاد السماد الجديد كل 25 مل بتتخفف بلتر ماء 

 هاي نتيجة الحب الزائد و الاهتمام الزائد للزريعة 

^

هذه حاليا بدون و لا ورقة :(

^

حاليا الورق المسود اكثر :(

^

بقايا زريعة بتمنى انها تعيش :(

سوق واقف

عطلة نهاية الاسبوع الماضي كانت مختلفة عن غيرها شوي لانه قضيناها في دوحة قطر، سفرة قصيرة لطيفة غير مخطط لها سابقا على الاقل من طرفي *_* 

 الدوحة مدينة صغيرة بس جميلة و نظيفة و مدينة بتحاول تلاحق التطور و العمران اللي في دبي بطريقة التقليد الملفت ، يعني نفس هندسة المجمعات التجارية و الابراج و نفس الاسماء. في ناس انتقضوا هالشي من قطر بس انا ما حسيته شيء غلط، لانه مش غلط نتطلع على الاحسن منا و نحاول نحسن من حالنا زيه و نتعلم منه بدل ما نضل بس نتفرج و تاركين الدنيا خرابه من حولنا

 على العموم بس تم عندهم شيء مميز و رائع و هو سوق واقف و هو عبارة عن سوق شعبي قديم لسه محافظة على طابعه القديم بس تحول لنقطة سياحية جميله فيها كل الخدمات من مطاعم مختلفة خليجية شاميه لبنانيه عراقية و قهاوي شعبية و غير شعبية و مدينة ملاهي و كرنفالات بالاضافة لسوق الاقمشة و البهارات و الدهب و سوق الطيور (طيور الزينة رهييييييييييييييب) بجد السوق اكثر من رائع بس للاسف ما كنت ماخده الكاميرا و لا شاحن المبوبايل فما كان في غير هدول الصور للسوق القديم :(

يا رب

فضل الذكر و الاستغفار

انها الحرب

ان الله راد اليوم رح ابلش رجيم بشكل جدّي لانه بصراحة مو راضيه عن هالكم كيلو الزيادة اللي زدتهم خلال السنة الماضية

هلأ الهدف الاساسي انه انزل 3 كيلو بس حكون كتير سعيدة اذا نزلت 5 كيلو

على اي حال حتى اعرف اسيطر على الرجيم رح اصير اكتب كل يوم شو اكلت عشان اعرف حالي شو خبصرت و كل نهاية اسبوع بتوزن و الله يجيب اللي فيه الخير

15.2.2012 

فطور 1 : 1/2 فنجان نسكافيه مع ربع معلقة سكر + قطعة كيكة موز - اظن لازم النظر في هذا الفطور

فطور 2 : 2 توست اسمر مع حبنة قليلة الدسم و شريحتين بندورة

سناك : شابورة للرجيم

يتبع  

أليس اللهُ بِكَافٍ عَبدَهُ

 واللهِ الذي لا إله إلا هو ما وكّل المؤمن أمره لله عز وجل يوماً إلا قضى له مطلبه ، وما استغاث به يوماً في أزمةٍ أتعبته إلا أغاثه بأفضل مما توقع ، وما خاف أمراً فدعاه إلا كفاه إياه ، وما استغنى به عن الناس إلا فتح له أبواباً من السكينة والطمأنينة

و من أصدق من الله قولا و هو من قال 

 "أليس الله بكاف عبده"
 ” إِذْ تَسْتَغِيثُونَ رَبَّكُمْ فَاسْتَجَابَ لَكُمْ ”
 “ أَمَّن يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ “

اللهم اني وكلت امري كله لك وحدك لا شريك لك يا ارحم الأرحمين

و من أقوال السلف الصالح

 إذا استغنى الناس بالدنيا فاستغن ِ أنت بالله ، وإذا فرحوا بها فافرح أنت بالله ، وإذا أنسوا بأحبابهم فاجعل أنسك بالله

 من سرّه أن يكون أقوى الناس ، فليتوكل على الله

إستعن بالله ولا تعجز واستغن به عن الناس فما الناس إلا وسائل أرسلها الله لنا 

روتين العمل

عندي حالة ملل رهيبة من العمل و روتين العمل لدرجة مش عم اعرف اركز في شغلي و عم بتأخر بتسليم الشغل عن موعده، و كمان نوعية و جودة العمل عم بتقل من قله و عدم التركيز. طبعاً كتير متضايقة من حالي و عم بحاول اطلع من هالمود بس بدون فايدة

حتى لما اخذت اجازة اسبوع من الشغل ما حسيت حالي اشتقت للشغل او انه راجعة متحمسه عليه

كل اللي بعمل بحط قائمة بالشغل المتعلق او المتأخر بس ما عم بعمل شي منه و القائمة عم بتطول كتير و انا بضيع ساعات كتير بس باللعب على الانترنت حتى اهرب من الشغل

هو الصراحة حالة هالملل مسيطرة حتى على حياتي خارج الشغل زهقانه من كل شيء و كل شي صاير بلا طعمه في حياتي و بحس حالي عايشة بلا طموح او هدف بس انه بدي اصحى عشان ارجع انام

كمان صاير عندي حالة من الانطوائية ما عم بحكي مع حدا من الناس سواء صحباتي او اقرابي بس بحب اضل لحالي صافنه و ما عم  بعمل شيء

حتى مدونتي زهقت منها و ما عم احب اجيها وكمحاولة للخروج من هالحالة جبرت حالي اكتب موضوع النكد هذا و بالعاميه و بدون تعب و تفكير لازبط الكلمات بس لاكسر هالحاجز 

 يا رب هدي بالي يارب و طلعني من هالحاله